Насанд хүрэгчид ерөнхийдөө ажил болон ажилтай холбоотой үйл ажиллагаанд өдөрт дунджаар 10 гаруй цаг зарцуулдаг. Үүнээс шалтгаалан маш олон хүн жин нэмж, биеийн ачаалал нь нэмэгдэн, дасгал хийх цаг хугацааны боломж тааруухан байдаг. Тэгвэл ажлын орчин, хооллолтын зуршлаа өөрчлөхөөр дамжуулан эрүүл амьдралд хүрэх боломжтой.
Эрүүл хэв маяг руу шилжихэд дараах асуудалд анхаарлаа хандуулна уу.
1. Гэрээсээ эрүүл зууш авч явах
Ажилд гарахаасаа өмнө урьдчилан төлөвлөж, гэрээсээ эрүүл хоол хүнс авч, хэт өндөр илчлэгтэй амттаныг орлуулж болно. Жишээ нь, самрын холимог, эсвэл овъёосны энергийн шахмал гэх зэрэг. Хөргөгчиндөө тараг, түүхий ногоо, шинэ соргог жимс, бяслагны шорлог зэргийг сонгож хадгалаарай. Эдгээр нь жигнэмэг, шарсан болон тослог хүнснээс илүү эрүүл сонголт юм.
2. Ажлынхантайгаа хамт хооллох
Судалгаанд харуулснаар, судалгаанд хамрагдсан хүмүүсийн 62 хувь нь өдрийн хоолоо ажлын өрөөндөө ганцаараа иддэг гэсэн байна. Харин хамт олонтойгоо хооллох нь хамтын ажиллагааг сайжруулж, ажлын бүтээмжийг сайжруулдаг. Хэрвээ хамтдаа гадуур алхвал илүү эрч хүчтэй болж, тайвшран, илүү их урам зоригтой ажиллах боломжтой гэдгийг судалгаанд харуулсан байна.
3. Жимсээр чихрийг орлуулах
“Нүднээс далд бол сэтгэлээс хол” гэдэг үг хооллолтын хувьд маш үнэн үг юм. Зүгээр л чихэр хийсэн саваа ширээнийхээ ард далд нуухад элдэв чихэрлэг хүнсний хэрэглээг мэдэгдэхүйц бууруулах боломжтой. Харин жимсний саваа ил байлгаж, жимс их идвэл, илүү эрүүл хооллолттой болох боломжтой.
4. Ус уухаа битгий мартаарай
Ус шингэн дутагдвал таны ой тогтоолтод сөргөөр нөлөөлж, түгшүүр, ядаргаа үүсгэдэг. Энь нь ажлын бүтээмжийг бууруулан, стрессийн улмаас илүү их зууш идэхэд хүргэдэг. Тиймээс ажилд явахдаа байнга усны саваа авч явах хэрэгтэй.
5. Автомат худалдааны машинаас хол байгаарай
Хэдийгээр олон хүн автомат худалдааны машин эрүүл бус хүнс зардгийг мэддэг ч, ихэвчлэн уруу татагдаад түүнийг авч иддэг. Эдгээр машинд олонхдоо хэт их сахар, давс, өөх тос агуулсан, шим тэжээл багатай хүнс, зууш байдаг.
Ялангуяа, үдээс хойш өлсөх үедээ автомат худалдааны машинаас зайгаа барихыг сануулж байна.
